ⵉⵜⵜⵓⵙⴳⵎⴹ ⴰⵙⵙ ⵏ ⵓⵙⵉⵎⵡⴰⵙ 10 ⴱⵕⴰⵢⵕ 2026, ⴳ ⵕⵕⴱⴰⵟ, ⵅⴼ ⵢⴰⵜ ⵜⵎⵢⴰⵇⵇⴰⵏⵜ ⵏ ⵓⵎⵙⴰⵙⴰ ⴳⵔ ⵓⴳⵔⴰⵡ ⴰⵏⴰⵎⵓⵔⵜ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ  ⴷ ⵓⵙⴱⴷⴷⵉ ⵏⵏⵙ  ⴷ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵓⵙⵡⵓⴷⴷⵓ ⴰⵙⵜⵔⴰⵜⵉⵊⵉ ⵏ ⵓⴼⵕⵕⵓ ⵏ ⵓⵡⴰⵏⴽ ⴷ ⵓⴹⴼⴰⵕ ⵏ ⵜⵉⵕⵡⵉ ⵏ ⵜⵎⵔⵙⴰⵍ ⴷ ⵜⵎⵙⵙⵏⵜⵉⵏ ⵏ ⵜⵉⴳⴷⵓⴷⴰⵏⵉⵏ, ⴰⵎⵎⴰⵙ ⵏ ⵜⵣⵎⵎⴰⵔ ⵏ ⵓⵙⵙⴷⵓⵙ ⵏ ⵉⵎⵏⵣⴰⵢⵏ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴳ ⵉⴳⵔ ⴰⴳⴷⵓⴷⴰⵏ ⴷ ⵓⵎⵥⵍⴰⵢ. ⵜⵜⵓⵙⴳⵎⴹ ⵜⵎⵢⴰⵇⵇⴰⵏⵜ ⴰⴷ ⴳ ⵓⵙⴰⵜⵉ ⵏ ⵓⵙⵎⵔⵙ ⵏ ⵉⵙⵓⵜⵍⵏ ⵏ ⵓⴷⵓⵙⵜⵓⵔ ⵉⵣⴷⵉⵏ, ⵙⵍⴰⵡⴰⵏ ⴰⴽⴽⵯ ⵉⵎⴰⵔⵔⵏ 36 ⴷ 167 ⵏ ⵓⴷⵓⵙⵜⵓⵔ, ⴷ ⵙ ⵓⵎⵙⴰⵙⴰ ⴰⴽⴷ ⵓⵍⵓⴳ ⵓⵟⵟⵓⵏ 46.19 ⵉⵣⴷⵉⵏ ⴷ ⵜⵓⴳⵔⴰⵡ ⴰⵏⴰⵎⵓⵔⵜ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ  ⴷ ⵓⵙⴱⴷⴷⵉ ⵏⵏⵙ, ⴷ ⵓⵍⵓⴳ ⴰⵙⴰⵜⵉ ⵓⵟⵟⵓⵏ 50.21 ⵉⵣⴷⵉⵏ ⴷ ⵓⵙⴳⴷ ⵏ ⵜⵎⵔⵙⴰⵍ ⴷ ⵜⵎⵙⵙⵏⵜⵉⵜⵉⵏ ⵜⵉⴳⴷⵓⴷⴰⵏⵉⵏ, ⴷ ⵓⵍⵓⴳ ⵏ ⵓⵟⵟⵓⵏ 82.20 ⵉⵣⴷⵉⵏ ⴷ ⵓⵙⵏⵎⴰⵍⴰ ⵏ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵓⵙⵡⵓⴷⴷⵓ ⴰⵙⵜⵔⴰⵜⵉⵊⵉ ⵏ ⵓⴼⵕⵕⵓ ⵏ ⵓⵡⴰⵏⴽ ⴷ ⵓⴹⴼⴰⵕ ⵏ ⵜⵉⵕⵡⵉ ⵏ ⵜⵎⵔⵙⴰⵍ ⴷ ⵜⵎⵙⵙⵏⵜⵉⵏ ⵏ ⵜⵉⴳⴷⵓⴷⴰⵏⵉⵏ. 

ⵜⵡⵜⵜⵙ ⵜⵎⵢⴰⵇⵇⴰⵏⵜ ⵏ ⵓⵎⵙⴰⵙⴰ ⴰⴷ ⵜⵙⵔⵙ ⵢⴰⵏ ⵓⵙⴰⵜⵉ ⴰⵙⵏⵎⴰⵍⴰⵢ ⵏ ⵓⵎⵢⴰⵡⴰⵙ ⴷ ⵓⵎⵙⴰⵙⴰ ⴷ ⵓⵎⵛⴰⵡⴰⵕ ⴳⵔ ⵙⵏⴰⵜ ⵏ ⵜⵎⵔⵙⴰⵍ, ⴳ ⵉⴳⵔⴰⵏ ⵏ ⵡⴰⵔⴰⵜ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⴷ ⵓⵙⴷⵓⵙ ⵏ ⵉⵎⵏⵣⴰⵢⵏ ⵏ ⵜⵏⵓⴱⴹⴰ ⵉⵖⵓⴷⴰⵏ ⴷ ⵜⵖⴰⵔⵉⵡⵉⵏ, ⴷ ⵓⵙⴼⴰⵍⴽⵉ ⵏ ⵜⵓⴷⵔⵜ ⵜⴰⴳⴷⵓⴷⴰⵏⵜ ⴳ ⵓⵙⴰⵜⵉ ⵏ ⵜⵙⵏⵓⵔⴰⵢⵜ, ⵎⴰ ⵢⴰⴷ ⵉⵎⵙⴰⵙⴰⵏ ⴷ ⵉⵡⵜⵜⴰⵙⵏ ⵏ ⵓⵙⵏⴼⵍ ⵏ ⵜⵎⵔⵙⴰⵍⵉⵏ ⴷ ⵜⵎⵢⴰⵇⵇⴰⵏⵉⵏ ⵜⵉⴳⴷⵓⴷⴰⵏⵉⵏ, ⴷ ⵓⵙⴷⵓⵙ ⵏ ⵜⵉⵕⵡⵉ ⴷ ⵜⵣⴷⴳⵉ ⴷ ⵓⵣⴷⴰⵢ ⵏ ⵜⵎⵙⵙⵓⴳⵓⵔⵜ ⴷ ⵜⵎⵙⵙⵉⴹⵏⵜ. 

ⵉⴽⵛⵎ ⴳ ⵉⴳⵔⴰⵏ ⵏ ⵓⵎⵢⴰⵡⴰⵙ, ⴰⵙⵏⴼⵍ ⵏ ⵜⵎⵓⵥⴰⵢⵉⵏ ⴷ ⵜⵉⵔⵎⵉⵜⵉⵏ, ⴷ ⵓⵙⵎⴰⵔ ⴷ ⵓⵙⵖⵣⵍ ⵏ ⵉⵖⴰⵡⴰⵙⵏ ⵏ ⵓⵙⵎⵓⵜⵜⴳ ⵉⵛⵛⴰⵔⵏ, ⴷ ⵓⵙⴽⴰⵔ ⵏ ⵜⵣⵔⴰⵡⵉⵏ ⴷ ⵉⵔⵣⵣⵓⵜⵏ ⵉⵛⵛⴰⵔⵏ, ⴷ ⵓⴱⵣⴰⵔ ⵏ ⵜⴽⴰⵕⴹⵉⵡⵉⵏ ⵏ ⵉⵔⵎⵉⵜⵏ ⵏ ⵓⵙⴳⵓⴼⵙⵓ, ⴷ ⵓⵙⵏⵎⴰⵍⴰ ⵉⵛⵛⴰⵔⵏ ⵏ ⵉⵙⵉⵏⴰⴳⵏ ⴷ ⵉⵎⵙⵎⵓⵏⵏ ⵏ ⵓⵙⵙⴼⵍⴷ, ⴷ ⵓⵙⵏⴼⵍ ⵏ ⵜⵓⵙⵙⵏⴰ ⵅⴼ ⵉⵙⵡⵓⴷⴷⵓⵏ ⴷ ⵜⵎⵙⴽⴰⵔⵉⵏ ⵜⵉⴳⵔⴰⵖⵍⴰⵏⵉⵏ ⵉⵖⵓⴷⴰⵏ, ⵓⵍⴰ ⵓⵙⵙⴼⵍⴷ ⵏ ⵜⵎⵔⵙⴰⵍⵉⵏ ⴷ ⵜⵎⵙⵙⵓⴳⵓⵔⵉⵏ ⵜⵉⴳⴷⵓⴷⴰⵏⵉⵏ ⴳ ⵓⵙⵔⵙ ⵏ ⵉⵏⴳⵔⴰⵡⵏ ⵉⴷⴷⵓⵔⵏ ⵏ ⵓⵙⵡⵓⴷⴷⵓ ⵏ ⵉⵔⵎⵉⵜⵏ ⵏ ⵜⴽⵕⴹⵉ ⴷ ⵓⵎⵏⵣⴰⵖ ⵏ ⵜⵏⴰⴼⵓⵜⵉⵏ. 

ⵜⵙⴰⵡⵍ ⵜⵎⵙⵙⴽⵜⵉⵜ ⴰⴷ ⴰⵡⴷ ⴼ ⵓⵙⵔⵙ ⵏ ⵢⴰⵜ ⵜⵙⵇⵇⵉⵎⵜ ⵉⵛⵛⴰⵔⵏ ⵏ ⵓⴹⴼⴼⵓⵕ, ⵏⵏⴰ ⵔⴰⴷ ⵉⵙⴽⵔ ⵢⴰⵏ ⵓⵖⴰⵡⴰⵙ ⵏ ⵜⵡⵓⵔⵉ ⴰⵙⴳⴳⵯⵙⴰⵏ, ⴷ ⵓⴹⴼⴼⵓⵕ ⵏ ⵓⵣⵣⴳⵉⵔ ⵏ ⵉⵎⵓⵙⵙⵓⵜⵏ ⵉⵜⵜⵓⵙⵏⵎⴰⵍⵏ, ⴷ ⵓⵙⴽⴰⵔ ⵏ ⵉⵏⵇⵇⵉⵙⵏ ⵏ ⵓⵙⵜⴰⵍ ⴰⵏⵎⵍⴰⵏ. 

ⵜⵎⵍⴰ ⵜⵎⴷⵔⴰⵡⵜ ⴰⴷ ⵜⵉⵔⴰⵜ ⵏ ⵙⵏⴰⵜ ⵜⵎⵔⵙⴰⵍ ⴰⴷ ⵙⵎⵓⵏⵏⵜ ⵜⵉⵣⵎⵎⴰⵔ ⵏⵏⵙⵏⵜ ⴷ ⴰⴷ ⵙⴱⵓⵖⵍⵓⵏ ⵜⴰⵎⵓⵏⵜ ⵏ ⵜⵎⵔⵙⴰⵍ, ⴰⴼⴰⴷ ⴰⴷ ⵙⵡⵓⵔⵉⵏ ⵙ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ ⴷ ⴰⴷ ⵙⴷⵓⵙⵏⵜ ⵜⴰⴷⵍⵙⴰ ⵏ ⵜⵣⴷⴳⵉ ⴷ ⵜⵏⵓⴱⴹⴰ ⵜⴰⵎⵙⵙⵓⴳⵓⵔⵜ ⴳ ⵜⵎⵔⵙⴰⵍ ⴷ ⵜⵎⵙⵙⵓⴳⵓⵔⵉⵏ ⵜⵉⴳⴷⵓⴷⴰⵏⵉⵏ.