ⵖ ⵓⵙⴰⵜⵉ ⵏ ⵓⵖⴰⵡⴰⵙ ⵏ "ⵜⴰⵙⵓⵜⵉⵏ ⵏ ⵜⵣⴷⴳⵉ", ⵉⵜⵜⵓⵙⴽⴰⵔ ⵖ ⵡⴰⵎⵎⴰⵙ ⵏ ⵓⵙⵎⵓⵜⵜⴳ ⴷ ⵉⵎⴹⴰⴽⴰⵕⵏ ⵏ ⵜⵎⵀⵍⴰ ⵜⴰⵏⵎⵏⴰⴹⵜ ⵏ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⴳⵎⵉ ⴰⵎⵏⵣⵓ ⴷ ⵜⵓⵏⵏⵓⵏⵜ ⴳ ⵎⴽⵏⴰⵙ, ⵢⴰⵏ ⵡⴰⵙⵙ ⵏ ⵓⴼⵔⴰⴽ ⵉⵥⵍⵉⵏ ⵙ ⵜⵥⵓⵕⵉ ⵏ ⵓⴼⵔⴰ, ⵙ ⵜⵏⴰⴼⵓⵜ ⵏ ⵉⵏⵍⵎⴰⴷⵏ ⴷ ⵜⵏⵍⵎⴰⴷⵉⵏ ⵏ ⵓⴳⵊⴷⵉ ⵉⵛⵛⴰⵔⵏ ⵏ ⵓⵙⵍⵎⴷ ⴰⵙⵉⵏⴰⵏ ⴰⵙⵎⴷⵉ, ⴰⵎⵎ ⵢⴰⵏ ⵓⴽⵛⵛⵓⵎ ⴰⵥⵓⵕⴰⵏ ⴰⵎⵙⵏⴼⵍⵓⵍ ⵉ ⵡⴰⵜⵉⴳⵏ ⵏ ⵜⵣⴷⴳⵉ, ⵜⴰⵖⵔⵎⴰ ⴷ ⵜⵎⵙⵙⵓⴳⵓⵔⵜ. 

ⴰⵏⵎⵓⵇⵇⴰⵔ ⴰⴷ ⴰⵙⵎⴰⵜⵜⴰⴳ ⵉⵙⵙⵏ ⴰⵙⵏⵎⴰⵍⴰ ⵜⵉⵙⴰⵡⴰⵔⵉⵏ ⵏ ⵓⵎⵔⴰⵔⴰ ⵏ ⵡⴰⵡⴰⵍ ⴷ ⵜⵉⵔⵔⴰ ⴷ ⵓⴼⵔⵔⵣ, ⵎⴰⴷ ⵉⴼⴰⵏ ⵉ ⵉⵏⵍⵎⴰⴷⵏ ⵎⴰⴷ ⴼⴽⵏ ⵜⴰⵏⵏⴰⵢⵉⵏ ⴷ ⵉⵙⵇⵙⵉⵜⵏ ⵏⵏⵙⵏ ⵅⴼ ⵜⵣⴷⴳⵉ ⴷ ⵓⵙⴱⴷⴷⵉ ⵏ ⵓⵙⴳⵓⴼⵙⵓ, ⴷ ⴰⴷ ⵙⵏⴼⵍⵏ ⴳ ⵜⵉⵔⵔⴰ ⵜⴰⵙⵏⴼⵍⵓⵍⵜ ⵏⵏⴰ ⵉⵙⵏⵓⵎⵍⵏ ⵜⵉⵍⴰⵡⵜ ⵏⵏⵙⵏ ⴷ ⵜⵉⵔⴰⵜ ⵏⵏⵙⵏ ⵙ ⵢⴰⵜ ⵜⵓⵜⵍⴰⵢⵜ ⵜⴰⵢⵎⵎⴰⵜ. ⵙⴳ ⵓⵙⵙⵍⵎⴷ ⵏ ⵜⵏⴰⵡⵉⵏ ⵜⵉⴷⵙⵍⴰⵏⵉⵏ, ⴰⵔ ⵜⵉⵙⴰⵡⴰⵔⵉⵏ ⵏ ⵜⵉⵔⵔⴰ ⵏ ⵜⵔⴰⴱⴱⵓⵜ ⴷ ⵓⵙⴼⴰⵍⴽⵉ ⵏ ⵡⴰⵔⵔⴰⵜⵏ, ⴰⵔ ⴰⵙⵎⵏⵉⴷ ⵏ ⵉⵙⴼⵙⵔⵏ ⵏ ⵓⴼⵔⴰ ⴷⴰⵜ ⵏ ⵉⵎⴷⵔⴰⵡⵏ. 

ⵉⵏⵍⵎⴰⴷⵏ ⴷ ⵜⵏⵍⵎⴰⴷⵉⵏ ⵙⴽⵔⵏ  ⵢⴰⵜ ⵜⵉⵔⵎⵜ ⵏ ⵓⵙⵙⵍⵎⴷ ⵉⵎⵣⴰⵔⴰⵢⵏ ⵏⵏⴰ ⵉⵎⵍⴰⵏ ⵜⵉⵣⵎⵎⴰⵔ ⵏⵏⵙⵏ ⵏ ⵓⵙⵏⴼⵍⵓⵍ ⴷ ⵓⵙⵉⵡⴹ ⵏ ⵜⴱⵔⴰⵜⵉⵏ ⵉⴷⵓⵙⵏⵉⵏ ⵙ ⵢⴰⵜ ⵜⵖⴰⵔⴰⵙⵜ ⵉⴷⵓⵙⵏ. ⵉⵙⵏⵎⴰⵍⴰ ⵓⵙⴼⵙⵔ ⴰⴷ ⵢⴰⵜ ⵜⴱⵔⵉⴷⵜ ⵏ ⵓⵙⵎⵓⵙⵙⵓ ⵉⵅⴰⵜⴰⵔⵏ, ⵉⵙⴷⴷⵉⴷⵏ ⵎⴰⵙ ⴷ ⵉⵄⵔⵔⵉⵎⵏ ⵖⵉⵏ ⴰⴷ ⵙⵎⴷⵏ ⴰⵜⵉⴳⵏ ⵉⵅⴰⵜⴰⵔⵏ ⵏ ⵡⴰⵎⵓⵏ, ⴷ ⴰⴷ ⵙⵙⴽⵔⵏ ⵜⵉⵡⵓⵔⵉⵡⵉⵏ ⵏⵏⵙⵏ ⵙ ⵜⵏⴰⵥⵓⵕⵉⵏ ⵜⵉⵜⵔⴰⵔⵉⵏ, ⴷ ⴰⴷ ⵙⵙⵎⵔⵙⵏ ⵜⴳⵓⵔⵉ ⴰⴷ ⵉⴳⴰⵏ ⵢⴰⵏ ⵓⴱⵔⵉⴷ ⵏ ⵓⵙⵏⴼⵍ ⵉⵃⵍⴰⵏ. ⵜⵙⵓⵍ ⵜⴰⵏⵏⵓⵔⵣⵎⵜ ⵏ  ⵓⵖⴰⵡⴰⵙ ⵏ ⵜⵙⵓⵜⵉⵏ ⵏ ⵜⵣⴷⴳⵉ  ⵅⴼ ⵉⵄⵔⵔⵉⵎⵏ, ⴷ ⵉⵙⴷⴷⵉⴷ ⵎⴰⵙⴷ ⴰⵙⵙⴰⵔⵓ ⴳ ⵓⵙⵏⴼⵍⵓⵍ ⵉⴳⴰ ⴰⵙⵙⴰⵔⵓ ⴳ ⵢⴰⵜ ⵜⵙⵙⵓⵜⴰ ⵉⴼⵔⴽⵏ ⴰⵎⵙⵙⵓⴳⵓⵔ ⴷ ⵓⵎⵙⴽⴰⵔ ⵏ ⵡⴰⵜⵉⴳⵏ.