ⵉⵙⴽⵔ ⵎⴰⵙⵙ ⵎⵓⵃⵎⵎⴰⴷ ⴱⵏⵄⵍⵉⵍⵓ, ⴰⵏⵙⵙⵉⵅⴼ ⵏ ⴰⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵓⵙⴱⴷⴷⵉ ⵏⵏⵙ, ⴰⵙⵙ ⵏ ⵓⵙⵉⵏⴰⵙ 1 ⴷⵓⵊⴰⵏⴱⵉⵔ 2025, ⴳ ⵢⴰⵏ ⵓⵔⵣⴰⴼ ⵏ ⵜⵡⵓⵔⵉ ⵉⵎⴹⴰⴽⴰⵕⵏ ⵏ ⵓⵙⵡⵉⵔ ⵢⴰⵜⵜⵓⵢⵏ ⴳ ⵜⵎⴷⵉⵏⵜ ⵏ ⵡⴰⵛⵉⵏⵟⵓⵏ, ⴷ ⵉⵎⵙⵜⴳⴳⴰⵔⵏ ⵏ ⵜⵎⴰⵡⴰⵙⵜ ⵏ ⴱⵕⵕⴰ ⵏ ⵎⵉⵔⵉⴽⴰⵏ, ⴷ ⵍⴱⴰⵏⴽ ⴰⵎⴰⴹⵍⴰⵏ, ⴷ ⵓⵙⵏⵜⵉ ⵏ ⵜⵣⵔⴼⵜ ⵜⴰⵎⴰⴹⵍⴰⵏⵜ (WJP), ⴷ ⵜⵖⵉⵡⴰⵏⵜ ⵏ ⵉⵣⵔⴼⴰⵏ ⴳ ⵜⵙⴷⴰⵡⵉⵜ ⵜⴰⵎⵉⵔⵉⴽⴰⵏⵉⵜ, ⴷ ⵓⵖⴰⵡⴰⵙ ⵏ ⵜⵏⴱⴰⴹⵜ ⵉⵕⵥⵎⵏ (OGP).

ⵉⴳⴰ ⵓⵔⵣⴰⴼ ⴰⴷ ⵎⵓ ⵉⵥⵍⵉ ⵡⴰⵏⴰⵡ ⵏⵏⵙ, ⵢⴰⵏ ⵓⵎⵏⵉⴷ ⴰⵙⵜⵔⴰⵜⵉⵊⵉ ⴳ ⵓⴱⵔⵉⴷ ⵏ ⵜⵡⵓⵔⵉ ⵏ ⵓⴳⵔⴰⵡ, ⴷ ⵜⵉⵍⴰⵍⵜ ⵏⵏⵙ ⵜⴰⴷⵙⵍⴰⵏⵜ ⴳ ⵓⵙⵏⴼⵍⵓⵍ ⴷ ⵓⵙⴱⵓⵖⵍⵓ ⵏ ⵜⵔⴰⴱⴱⵓⵜ ⵏ ⵉⵙⵏⵎⵎⴰⵍⵍⴰ ⵉⴳⵔⴰⵖⵍⴰⵏⵏ ⵉⵣⴷⵉⵏ ⴷ ⵓⵙⴱⴷⴷⵉ ⵏ ⵓⵙⴳⵓⴼⵙⵓ, ⴷ ⵓⵙⵎⵎⴰⵍ ⵏ ⵜⵙⵔⵜⴰⵏⵉⵏ ⵜⵉⴳⴷⵓⴷⴰⵏⵉⵏ ⵜⵉⴳⵔⴰⵖⵍⴰⵏⵉⵏ, ⵙⵍⴰⵡⴰⵏ ⴰⴽⴽⵯ ⴳ ⵉⴳⵔⴰⵏ ⵏ ⵜⵏⵏⵓⴹⴰ, ⴷ ⵜⵣⵔⴼⵜ, ⴷ ⵉⵔⵣⵣⵓⵜⵏ ⵉⵥⵕⴼⴰⵏ, ⴷ ⵓⵎⵙⴱⴷⴷⵉ ⵏ ⵓⵙⴳⵓⴼⵙⵓ ⵉⵣⵔⵉⵏ ⵉⵡⵜⵜⴰ.

ⵉⴳⴰ ⵓⴽⴰⴱⴰⵕ ⴰⴷ ⴰⵣⵎⵣⵣⵓ ⵢⴰⴷ ⴰⴷ ⵉⵙⵙⵏ ⵉⵎⵣⵡⵓⵔⴰ ⵉⵙⵏⴼⵍⵏ ⵉⵎⴰⵢⵏⵓⵜⵏ ⴳ ⵉⴳⵔ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⴷ ⴰⴷ ⵉⵙⵎⵙⴰⵙⴰ ⵜⵉⵣⵎⵎⴰⵔ ⵏⵏⵙ, ⵎⴰ ⵢⴰⴷ ⵢⵓⵊⵊⴰⵏ ⵜⵙⵏⵓⵔⴰⵢⵜ ⴰⴷ ⵜⵙⴷⵓⵙ ⵜⵉⵥⵉⴹⵕⴰ ⵏⵏⵙ ⵏ ⵓⵙⴼⵙⵉ ⴷ ⵓⵙⵏⵎⴰⵍⴰ, ⴷ ⴰⴷ ⵜⵙⵙⴷⵓⵙ ⵜⴰⵏⵏⴰⵢⵜ ⵏⵏⵙ ⵜⴰⵙⵜⵔⴰⵜⵉⵊⵉⵜ, ⴷ ⴰⴷ ⵜⵕⵥⵎ ⵉ ⵜⵏⴰⴼⵓⵜⵉⵏ ⵏ ⵓⵎⵢⴰⵡⴰⵙ ⴷ ⵜⵎⴷⵔⴰⵡⵉⵏ ⵜⵉⵎⵔⵙⴰⵍⵉⵏ ⵎⵏⵏⴰⵡ ⵏ ⵜⴼⵓⵍⵉⵏ ⴳ ⵓⵙⴰⵜⵉ ⵏ ⵉⵙⵏⴼⴰⵔⵏ ⵍⵍⵉ ⵅⴼ ⵉⵙⵡⵓⵔⵉ ⵓⵙⴰⵔⵓ ⵏⵏⵙ.

ⴳ ⵓⵏⴰⵎⴽ ⵏⵏⵙ ⴰⴳⵡⵏⵙⴰⵏ, ⵉⴳⴰ ⵓⵔⵣⴰⴼ ⴰⴷ ⵢⴰⵜ ⵜⵎⵔⵙⵍⵜ ⵉⴼⵓⵍⴽⵉⵏ ⵏ ⵜⵎⴷⵔⴰⵡⵜ ⵏ ⵍⵎⵖⵔⵉⴱ ⴳ ⵜⵣⵎⵎⴰⵔ ⵜⵉⴳⵔⴰⵖⵍⴰⵏⵉⵏ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⴰⵎⵎ ⵢⴰⵏ ⵓⴳⴰⴷⵉⵔ ⴰⵎⵙⵙⵉⵡⵍ ⴷ ⴰⵎⵙⴽⴰⵔ ⴷ ⴰⵎⵙⴱⵖⵓⵔ ⴳ ⵓⵙⴰⵜⵉ ⴷⵖ, ⴳ ⵓⵙⴰⵜⵉ ⵏ ⵓⵎⵢⴰⵡⴰⵙ ⴰⵙⵓⵍⴰⵏ ⵉⴱⴷⴷⵏ ⵅⴼ ⵜⵓⴳⴳⴰⵣ ⵉⴷⵓⵙⵏ ⵏ ⵓⵙⴱⴷⴷⵉ ⵏ ⵜⴽⵕⴹⵉ, ⵎⴰ ⵢⴰⴷ ⵉⴳⴰⵏ ⵢⴰⵏ ⵓⵖⴰⵡⴰⵙ ⴰⵏⴰⵎⵓⵔ ⵉⵟⵟⴰⴼⵏ ⵢⴰⵜ ⵜⵏⴰⴼⵓⵜ ⵜⴰⵅⴰⵜⴰⵔⵜ, ⵉⵣⴷⵉⵏ ⴷ ⵜⵏⴰⴼⵓⵜⵉⵏ ⵜⵉⴳⵔⴰⵖⵍⴰⵏⵉⵏ ⵉⵜⵜⵓⵙⵏⴼⵍⵏ ⴷ ⵉⵎⵢⴰⵏⴰⵡⵏ.