ⵉⵏⵏⴰ ⵎⴰⵙⵙ ⵎⵓⵃⵎⵎⴷ ⴱⵏⵄⵍⵉⵍⵓ, ⴰⵏⵙⵙⵉⵅⴼ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⴳ ⵜⵙⴳⵓⵔⵉ ⵏⵏⵙ ⴳ ⵓⵏⵎⵓⵇⵇⴰⵔ ⴰⵄⵕⴰⴱ-ⴰⴼⵔⵉⵇⵉ ⵅⴼ ⵜⵎⵙⵙⵏⵜⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵍⵍⵉ ⵜⵙⵏⵎⴰⵍⴰ ⵜⵎⵓⵔⴰⵢⵜ ⵜⴰⴳⵔⵎⴰⵡⵙⴰⵙⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ 24 ⴷ 25 ⵢⵓⵏⵢⵓ 2025 ⴳ ⵎⵕⵕⴰⴽⵛ, ⵎⴰⵙ ⵉⵎⵏⵉⴷⵏ ⵏ ⵓⵎⵙⴰⵡⴰⵍ ⵅⴼ ⵜⵎⵙⵙⵏⵜⵉⵜ, ⵓⵔ ⵙⵓⵍ ⴱⴷⴷⵏ ⵖⴰⵙ ⴼ ⵜⵎⵢⴰⴷⴰⵙⵜ ⵜⴰⴷⵎⵙⴰⵏⵜ, ⵎⴰⵛ ⵜⴽⵛⵎ ⴳ ⵢⴰⵜ ⵜⵙⵓⵜⵍⵜ ⵜⴰⵎⴰⵢⵏⵓⵜ ⵍⵍⵉ ⵉⵙⴽⴰⵔⵏ ⵖ ⵜⵎⵙⵙⵏⵜⵉⵜ ⵢⴰⵏ ⵓⵎⵙⴽⴰⵔ ⴰⵎⵙⴹⵉⵚ ⴳ ⵓⵙⵎⵣⴰⵣⵍ ⵏ ⵉⵣⵔⴼⴰⵏ, ⴷ ⵢⴰⵏ ⵡⴰⵍⵍⴰⵍ ⵉⴷⵓⵙⵏ ⴳ ⵓⵙⵙⴷⵓⵙ ⵏ ⵜⵔⵙⴰⵍ ⵏ ⵡⴰⵔⴰⵢ ⵙⴳ ⵓⵙⴳⵓⴼⵙⵓ.

 ⵎⴰⵙ ⴱⵏⵄⵍⵉⵍⵓ ⵉⵙⵉⵙⴼⵉⵢ ⵎⴰⵙⴷ ⴰⵙⵏⴼⵍ ⵏ ⵉⵎⴷⵢⴰⵜⵏ ⵉⴷⴰⵎⵙⴰⵏⵏ ⵉⵎⵙⴰⵙⴰⵏⵏ, ⴷⴰ ⵙⵔⵓⵙⵏ ⵜⴰⵣⴷⴳⵉ ⴳ ⵡⴰⵎⵎⴰⵙ ⵏ ⵜⴰⵏⵏⴰⵢⵜ ⵜⴰⵙⵜⵔⴰⵜⵉⵊⵉⵜ ⵏ ⵜⵎⵙⵙⵏⵜⵉⵜ, ⵔⴰⴷ ⵉⵙⴽⵔ ⵢⴰⵜ ⵜⴰⴱⵔⵉⴷⵜ ⵏ ⵓⵙⴷⵓⵙ ⵏ ⵜⵣⴷⴳⵉ, ⴷ ⵓⵍⴰ ⵏ ⵉⵎⵉⴽⴰⵏⵉⵣⵎⵏ ⵏ ⵓⵙⵓⵖⵓⵏ ⴰⴳⵯⵏⵙⴰⵏ, ⴷ ⵓⵙⵙⵉⴷⴼ ⵏ ⵉⵎⵉⴽⴰⵏⵉⵣⵎⵏ ⵏ ⵓⵛⴽⵎ ⵏⵏⵙ, ⵎⴰⵢⴰⴷ ⵉⴳⴰⵏ ⵜⵉⵎⴳⴳⵉⵜⵉⵏ ⵜⵉⵜⵉⵇⵏⵢⵢⵉⵏ ⵉⵅⵚⵚⴰⵏ ⴰⴼⴰⴷ ⴰⴷ ⵏⵣⵣⴳⵔ ⵜⵓⵏⴳⵉⵏⵜ ⵏ ⵜⵙⵏⵙⵉ ⵜⴰⴷⵔⴰⵡⵜ ⵏ ⵉⵙⵍⴳⵏⵏ ⴷ ⵉⵏⵎⵓⵍⵍⴰ ⵙ ⵓⵎⵏⵉⴷ ⵏ ⵢⴰⵏ “ⵓⵣⴰⵖⵣ ⵉⴷⵓⵙⵏ ⴷ ⵓⵔⵓⵛⵛⵉⵍ ⵏ ⵜⵏⵉⴷⵉⵜⵉⵏ ⵏ ⵜⵣⴷⴳⵉ”. 

ⵉⵙⴷⴷⵉⴷ ⵎⴰⵙⵙ ⴱⵏⵄⵍⵉⵍⵓ ⵎⴰⵙⴷ ⵉⴳⵔ ⵉⵥⵍⵉⵏ ⵉⴳⴰ ⴰⵎⴷⵔⴰⵡ ⵉⵅⵚⵚⴰⵏ ⴳ ⵓⵙⴱⴷⴷⵉ ⵏ ⵓⵙⴳⵓⴼⵙⵓ, ⴰⵛⴽⵓ ⵜⵎⵙⵙⵏⵜⵉⵜⵉⵏ ⵏⵏⴰ ⵉⵙⵙⴽⵛⴰⵎⵏ ⵜⵉⵏⵉⴷⵉⵜⵉⵏ ⵏ ⵜⵣⴷⴳⵉ ⴳ ⵡⴰⵎⵎⴰⵙ ⵏ ⵓⵎⴷⵢⴰ ⴰⴷⵎⵙⴰⵏ ⵏⵏⵙⵏⵜ, ⵓⵔ ⴷⴰ ⵜⵜⵃⵟⵟⵓⵏ ⵉⵎⴰⵏ ⵏⵏⵙⵏⵜ ⵖⴰⵙ ⵙⴳ ⵉⵎⵉⵣⵉⵜⵏ, ⵎⴰⵛⴰ ⴷⴰ ⵜⵜⴰⵡⵙⵏ ⴳ ⵓⵃⵟⵟⵓ ⵏ ⵜⴷⴰⵎⵙⴰ ⵜⴰⵏⴰⵎⵓⵔⵜ, ⴷ ⵓⵙⴷⵓⵙ ⵏ ⵜⵎⵔⵙⴰⵍⵉⵏ ⵎⵏⵉⴷ ⵏ ⵓⵙⴳⵓⴼⵙⵓ.